● A cummuna di Marignana hà pigliatu i so limiti ughjinchi in lu 1862 sott'à l'ordine di Napulione III, è a cummunità di Revinda (prununcia : Ré-vinda), tandu parte di e Cristinacce, hè stata addunita à quella marignanese. Face chì si trova dui paisoli annant'à i so tarreni cummunali : Chidazzu, luntanu 1,5 chilometru, è Revinda, alluntanatu 15 chilometri.

Eccuci una carta insignendu e 9 cummune di u cantone di i Dui Sevi : quella marignanese hè verde scuru, è quelle d'Evisa è di e Cristinacce sò verde chjaru, datu chì st'inseme certe volte vene chjamatu "piccula Castagniccia".

Carta di e cummune di i Dui Sevi : i paesi è paisoli sò situati ind'elli ci sò i numari

Ligenda : 1 : paese è cummuna di Marignana | 1' : paisolu di Chidazzu | 1'' : paisolu di Revinda | 2 : paese è cummuna d'Evisa | 3 : paese è cummuna di e Cristinacce |4 : paese è cummuna d'Ota | 4' : Portu, marina d'Ota | 5 : paese è cummuna di Sarreda | 6 : paese è cummuna di Partinellu | 7 : paese è cummuna d'Osani | 8 : paese è cummuna di a Piana | 9 : paese è cummuna di Carghjese.

● L'altitudine di i tarreni cummunali hè cumpresa trà 13 metri è 1331 metri (infatti u Capu di u Vitullu face parte di a cumuna di Marignana). Hè assai slivillatu u tarrenu, è ci si trova cullette (a Culletta à e Conche 1027 m, a Culletta à u Prunu  969 m, culletta di Pianu Maiò,...), picculi monti rutondi (Capu à l'Acella 1272 m, e sarre di Santa Degna è di a Femina Morta, ... trà 1000 metri è 1200 metri), monti pinzuti (Capu di u Vitullu 1331 metri, Capu à u Monte 1110 metri), valle è ghjargali (a Tavulella, Fiuminale), una spiscia alta 100 metri (Spiscia di l'Aiva bona), vegetazione fatta di machja, è soprattuttu castagneti ignulocu. Par fassi una idea d'issi tarreni, eccuci une poche di viste di u tarritoriu di a cummuna sciute da Google Earth :

 

 

 

 

 

Truvarete ditagli di più à prupositu di i nomi è e cunfine di i lochi di a cummuna in lu capitulu "Lochi marignanesi".