5) u Capu Suariccione : da a casa furistera d'Aitone à Sott'à u Capu Suariccione
Partanza : | a pista da culandi à a casa furistera, in la furesta d'Aitone |
Distanza : | circa 2,6 km (andà) |
Slivellu : | circa 200 m |
durata : | 45-60 min (andà) |
Difficultà d'orientazione : | alcuna |
Difficultà fisica : | faciule |
Rimarche : | hè megliu à andacci da mane o à u ciuttà di u sole |
Carta |
||
|
A partanza si face da a pista in faccia à casa furistiera, in la furesta d'Aitone.
A pista colla senza ch'ella ci sia una cansa à u principiu.
Si pò fà prò di u frescu (ancu d'istate) sott'à i pini. Si ghjunghje à un muru (chì pare d'arruchjà a furesta sana, for'di e piste)
Tandu si gira versi a manca è ci vole à ùn piglià micca e canse nè à dritta nè à manca. Da vede l'illustrazione quì sottu.
Dopu circa 45 minuti di marchja, si trova sta cansa quì. Ci vole à lascià a pista principale chì cuntinueghja drittu è piglià a pista chì pare di fà andà in daretu.
Oramai i pini sò menu numarosi è più spapersi, è ùn semu più parati da u sole.
Dopu à pocu pressu 10 minuti, si ghjunghje à a "fine" di a furesta d'Aitone (in irrialità, si passa da l'umbriccia à a sulana, cù una vegetazione sfarente assai). Ùn ci hè più pista ma ci vole à cuntinuà calchì dicina di metri. Hè ancu megliu à cullà un pucarellu par avvede bè à Evisa. Eccu u panurama da quassù.
Evisa è Ota parenu infilarati.
Si vede bè à Marignana, è si pò rimarcà u paese in irruvine di u Tassu à l'inghjò à manca, è a so pusizione rispett'à Marignana.