7) a minera di u farru : da Marignana à a minera di u farru
Partanza : | a Bocca à u Mammucciu 824 m, dopu u stadiu di Marignana à e Pasturecce |
Distanza : | circa 6 km (andà) ; 3 km sì in 4x4 fin'à a fine di a pista |
Slivellu : | circa 400 m (andà) + 50 m (vultà) ; 60 m (andà) + 50 m (vultà) sì in 4x4 fin'à a fine di a pista |
durata : | 1 - 2 ore (andà) ; 30 - 60 minuti sì in 4x4 fin'à a fine di a pista |
Difficultà d'orientazione : | alcuna |
Difficultà fisica : | poca, ma a cullata pò stancà e parsone micca avvezze à a marchja |
Rimarche : | u più si colla solu fin'à Santa Degna. Spassiata sposta à u sole sguasgi sempre. Un passu hè strettu è spostu ma senza difficultà nè piriculu par via di a prisenza d'un filu da tenesi |
Carte |
© IGN PARIS 2007 |
|
Si parte da a Bocca à u Mammucciu marcata cù una croce, dopu à e Pasturecce è si colla par una pista di tarra, prima intundatu da i castagni è a machja.
Dopu a vista hè menu imbrugliata. Frà altru si pò vede a siluetta di u Monte d'Oru (à manca) è di a Punta à u Migliarellu.
Marchjendu abbastanza prestu si ghjunghje à un muru, chjamatu "u Muru à u Quarciu", dopu una mez'ora di marchja. Hè a fine di a pista, eppo' ci hè una strada. A cullata hè si pò dì compia.
Torna una mez'ora di marchja è dop' à Santa Degna, u Ritundellu, e Fughjichje è a Pulmunaccia si ghjunghje à a Bocca à a Femina Morta supranata da l'imprissiunante strada di petre.
Da nutà a vista versu a Paglia Orba è u Capu Tafunatu.
A strada piglia altitudine di manera rigulare.
Più insù, s'avvede sempre a Paglia Orba è u Tafunatu, ma sta volta cù Evisa chì pare di ghjace à u so pede.
Compiu a cullata, a strada parte versi u Golfu di Saone chì s'avvede in fondu.
Accorre à signalà un passu strettu è spostu, puru senza piriculu grazia à un filu, chì dumanda attinzione.
In fine, si ghjunghje à a minera di u farru, cù assai sbreiu di petre scavate ghjustu dananzu.
Ghjuntu quì, hè intarissante à cullà un suppulu fin'à a cresta par prufittà di a vista magnifica (soprattuttu da mane o da sera) versi u Golfu di Portu. Si vede dinò à Ota.